హైదరాబాద్: పోక్సో (POCSO) కేసు నమోదైన వెంటనే నిందితుడైన పి. రాజ్‌కుమార్‌ను షాబాద్ పోలీసులు అరెస్ట్ చేయకపోవడం వల్లే ఆరుగురి దారుణ హత్య జరిగిందని బాధితురాలైన బాలిక కుటుంబ సభ్యులు ఆరోపించారు. ఈ ఆరోపణల నేపథ్యంలో, ఫ్యూచర్ సిటీ పోలీస్ కమిషనర్ తరుణ్ జోషి స్పందిస్తూ.. ఈ కేసును దర్యాప్తు చేస్తున్న సబ్-ఇన్‌స్పెక్టర్ (SI) టి. రమేష్‌ను సస్పెండ్ చేయడంతో పాటు, షాబాద్ ఇన్‌స్పెక్టర్ బి. కాంతారెడ్డికి ఛార్జ్ మెమో జారీ చేశారు. ఏడాది క్రితం బాలిక తండ్రి మరణానికి కూడా ఈ నిందితుడే కారణమని కుటుంబ సభ్యులు ఆరోపించగా.. అతను అనారోగ్యంతోనే చనిపోయాడని పోలీసులు పేర్కొన్నారు.
పోలీసుల నిర్లక్ష్యం: “మేము ఇచ్చిన ఫిర్యాదుపై పోలీసులను నిరంతరం సంప్రదిస్తూనే ఉన్నాం. కానీ రాజ్‌కుమార్ పరారీలో ఉన్నాడని వారు చెబుతూ వచ్చారు. అయితే, అతను ఊరిలోనే స్వేచ్ఛగా తిరగడం మేము చూశాం. పోలీసులు తమ బాధ్యతను సక్రమంగా నిర్వహించి ఉంటే ఈ ఘోరం జరిగి ఉండేది కాదు” అని బాలిక తరపు బంధువు ఒకరు ఆవేదన వ్యక్తం చేశారు.
Leave a comment